@@ تكه ووو وتكه @@ بقلم الشاعر عبدالله ابو النجا

@@ تكه ووو وتكه @@

دُم *تك *دُم *تك * تك دُم *

@@@

ماترسى ياصاحبى لك على حال

ياللى بتعشق رتم الطبال

زى الغربال... فى ايد النخال

مع تكّه يمين وتكّه شمال

@@@

عايش فى الدنيا ولا يهمّك

غير مصلحتك يابرود دمّك

وتبيع الحضن اللى يضُمّك

وتقول بالمال الحال بقى عال

مع تكّه يمين وتكّه شمال

@@@

عايش ف الدنيا ضميرك مات

مصلحتك مش هيجبها ثبات

مبادى ايه كفايه شعارات

والدنيا معاك اطلبنى وهات

تلقانى معاك لهواك شغال

مع تكّه يمين وتكّه شمال

@@@

يا اخواتى دا صنف عايش فينا

ممكن نلقاه بين اهالينا

تتعجب ليه ناس وسطينا

باعو ضميرهم للهوى والمال

مع تكّه يمين وتكّه شمال

@@@

لكن الحر ابو قلب اصيل

اللى فى قلبه انوار قناديل

لو مالت الدنيا معاه مايميل

ولا عمره يكون كذاب مُحتال

ولا تكّه يمين وتكّه شمال

@@@

عارف رزقه على الرزاق

عارف معنى كلمة اخلاق

لايحب رياء ولا عنده نفاق

راضى بحاله مرتاح البال

ولا تكه يمين ولا تكه شمال

@@@@@@@@

القلم الحر

عبدالله ابو النجا