اراجع نفسى واسافر وارحل
ومعلش استحمل وانا مكسور،،،
مجروح خايف لأحسن يقولو جعان
بعد عمر طويل كنت انا فيه الأصيل عزيز مستور،،،
لبه يا وطن حضنك جفا
ودايما حقى فيك واقف ومستنى الدور،،
دايما بتطردنا واحنا بنحبك
وبتودعنا بكلمه غور،،،،
هو انا دايما على المسرح دورى
ساقيه تلف معلق ومنسى فيها زى التور،،،
دا انا ابنك اللى ضحى ورفع علمك
وقال الله اكبر على بارليف
وكتب هناك على ارضه بدمه عبور،،
ليه تسبينى للغربة ابات مغلوب
وانا اللى كنت فى يوم بطل منصور،،،
شباب كتير سافر وف قلبه حسره
وخطاه حزينه بدون امل
سابك وودع بيبكى وكان مقهور،،،
طب ليه الحلم فى بلدى بعيد
وبينى وبينه خرسان ومسلح وسور بيدور،،
فى بلاد الحلم صاروخ فى الفضا مطلوق
وانا حلمى بيدارى مكسوف راكب حنطور،،،
على أمل فى يوم يتعدل
واكون راضى على حالك واكون مسرور،،
واخرج من كهوف ضلمه عشقناها
والمح بعينى أمل وبعض النور،،،،،
هو انتى يا بلدى مكتوبلك
ولا معمولك عمل مسحور
امتى بقى اصرخ فى الفشل
وتتهد الحواجز بعد بياض الشعر
وافرح بيكى عروسه ويتلم الدور
يا ريت يا بلدى تسمعى لاولادك مره
ارجوكى وحياتك يا عظيمة أكون مشكور،،،
راح فين حضنك وتكريمك
دبحتى صوتى من زمن بنده عليك
نشفتى ريقى وتركتى مراره فى حلق الزور،،،
وعتاب يا بلدى اللى بنحبك ومن غير زعل
بصراحه كتير منا طحنتيهم إناث وذكور،،،
وكان نصيبنا من الامل ويوماتى
حلم وفيه كابوس منشور،،،
هو راح فين التاريخ والبنا
اللى على حجر الهرم محفور،،،،
انا يا مصر بفكرك بأسمك الغالى
واللى فى قرآن الكريم مذكور،،،،
بقلم مراد مصطفى مراد
ليست هناك تعليقات:
إرسال تعليق