عتمة الليل والفراق / بقلم الشاعر/ خليفه رمضان
عتمة الليل والفراق
للشاعر ابراهيم خليفه رمضان
وقريتك جوه كتاب من صغري
وتعلمت عشان خاطرك ( الحساب )
والكتاب دوغري
قوام خلصته
علشان اوصلك
وفهم معانيك
واغوص في السر / المكتوم جواكي
وعرف ليه الناس قاعدين علي بابك
يقروا الفناجيل والمندل
وقريتك عناوين ضخمة
ضخمه لحد التخمة
وكرهت ساعات نفسي
كيف الناس توصلك قبلي ؟
وتعافر جواكي وتعشق
تعشق تحبل منك
والمولود ينزل علي حجرك
يتمرمغ
يملا الدنيا صراخ وعويل
الضحكة تجلجل براكي
جواكي روح بتموت
روح بتمد تسد تهد تحد
روح منزوعة
روخ مقبوضه
روح بتشاكس
جوه حواري الليل
وأنا بحلم إني أشوفك
واكلم روحك
واكلم نفسي اللي اشتهتك
ولما وصلت لدارك
ملاني الغيظ
كيف عيل مفطوم م البزه
ومش قادر يصلب طوله ويعافر
جوه الليل المبدور جواها
والليل عتمه بيسرقنا
تتشكل جوانا ملامحه
حلم وبنوته
كانت بتقول في بداية الحدوته
توته توته
لا هي حلوه ولا ملتوته
لكن يمكن احلي من حواديت الجده
اللي بتحكي إن الشاطر
قبل ما يوصل
طلعت ليه الغوله
والجده في نهاية الحدوته
طلبت منا نجاوب
حلوه ولا ملتوته ؟
نهرب منها قوام بالنوم
ونقول فليحيا الليل
العمران بالضلمه
الضلمه اللي بتسرق روحنا
ساعة مايجي سؤال الجده
ونام
علشان نصحي
نلقي الزحمه
كلت الرحمه
وسايبه قدام بابنا
حالة أحزان
وسؤال مصلوب
علي باب الليل المتخبي
جوه الجدران
ليست هناك تعليقات:
إرسال تعليق