طبيعة حلمى مختلفه / بقلم الشاعر/ هانى اّدم
طبيعة حلمى مختلفه
بتعشق فى السراب غايه
بتجرى من البشر هربا
مخافة تكفير اﻵيه
طبيعة حلمى مكبوته
فى حلم العشق حريه
يا مصر يا شارده من أهلك
حنين جوايا يندهلك
حنين طفله لمرجيحه
فى ليلة العيد و ضلايه
و أملى الجاي و الراحل
تفاصيل وصفه جوايا
مشاعر واد قالوا مراهق
بيرسم ع الشجر حرفين
و يسهر ليله بيسبح
مناه يكبر شهور و سنين
و فجأه كبر لقى الدنيا
بتصغر فوق تفاصيله
و يملا الدمع مناديله
شروخ و آهات
زمان كان نفسه يطلع أب
و يطبطب على ولاده
زمان كان فى الهوا عناده
بيطرح شوق
و فاق على ضلمه بتلغوش
على القلب اللى كان أبيض
و ذكرى بتوحش الغايبه
فى أخته أمل كفر أعرض
زهد شفافيته البمبى
و لقى لونه البرئ ممسوخ
عايش باﻹسم مش مسموح
لحلمه يكمل السكه
يا ريتها ما فارقت الدنيا
و لا سابتلى الوجع طارح
بتيجى ف بالى ليه بكره
و بعده و يومى و إمبارح
سبقنى وليدى للقاها
و خدها ف حضنه بالنيه
نيابه عن الحزين والده
و عن أم إنحنت ليا
حنينى بيوجع اﻵهه
و يوجد فى العيون دمعه
بتوجع غصب عن رفضى
و تكسر فى الظلام شمعه
عجزت أبان شديد جامد
دموعى حرام تبان منى
عجزت ف صمتى مع إنى
عافرت كتير و ما عرفتش
سبيلى فى الوحده ضلايه
و صبر على البلاء مره
و على فرقة حبايبى وعود
بيوم لقا فى السما موعود
ياسين و أمل
هانى آدم
ليست هناك تعليقات:
إرسال تعليق