سيتي أحسان / بقلم الشاعره / أمل يونس
سيتي أحسان
..................
جوه سطوح الحب زمان
كان فيه وردة قاعدة تغني
حضنتها عيون سيتي أحسان
قالت: همي أطلبي وإتمني
إزرعي حلم يحيي الأوطان
أصبري حبه،وحبه إستني
لو يوم قلبك لمسه آذان
قولي لنبضه إتوضى وصلي
خلي حجابك عفه إيمان
بين قرآنك حبي وكني
قالت: حاضر ياسيتي أحسان
كانت سيتي صوتها يحني
يرقص روحي،يضحك سني
فزت وردة سامعة وساكتة
قامت قالت:
عندي سؤال يا سيتي أحسان
لو فيه مرة شيطاني غلبني
توهت ف دنيا موجها عجبني
أعمل إيه ياسيتي أحسان؟
كانت سيتي عنيها ألماظ
تعكس فيها جمال الماس
بصت بصة،همست همسة
نفضت بيها قلب الوردة
علي سيجادة وسبحه بلمسة
مسكت إيد الوردة الشاردة
قالت: شايفه صوابعك ديا؟
أحفري فيهم (إسم الله).
بين الأرض والسما والميه
حصناهم ب(سبحان الله).
أربطي عقله ف ديل العقله
إحشي فراغهم ( بحمد الله).
شيطان مهزوم ب(أعوذ بالله).
(الله اكبر) ف عينه حداد
تكسري أنفه بإذن الله
ويفضل ليكي حجاب وميلاد
فجاءة الصمت هد الباب
عين الوردة رمشت رمشة
جمد الدم ف عروقها وساب
سمعت شهقة تشهد بالله
جمر الحزن إتهز وداب
صرخت كل ورودنا الغالية
مالك،مالك يا سيتي أحسان؟
غليت كل جوارحي ف ثانية
أبص لسيتي....وشها نور!!
يضوي سطوحنا بلون بنور!
ردي عليا ياسيتي أحسان!!
ردت وردة بصوت مكسور
ماتت،ماتت سيتي أحسان
.......................امل يونس
ليست هناك تعليقات:
إرسال تعليق