حروف / بقلم الشاعر/ محمد عسل
(حروف)
ياراقده يوماتي ع الأوراق..تمانيه وبعدها عشرين.. دي أعدادِك ..بقالها زمان.. وأنا وانتي لفين رايحين؟يافضحاني...برغم إني ببيع كتمان ...كتبتي القلب إنه حزين!!ياكشفاني.. ماكنتي تداري وتخبي.. خلاص يعني بقالك عين؟! وهو اشمعني وقت الحب بتروحي؟!ووقت الشوق بلاقيكي كأنك طفل عُمرُه يومين؟! وهو اشمعني وقت الحُزن وجروحي.. بلاقيكي بألف لسان..وجايبَه معاني بالملايين؟!دا حتي ياشيخه لما أحلم.. وأنادي عليكي بتقولي.. مفيش غيرهم يادوب حرفين.. وأقول ماشي ..هاتيهم يلا وتعالي.. تجيبي ( هَم )وسط قوسين.. تعبتيني.. ياحبة حُزن ع الأوراق.. كفايه جراح وويل وأنين.. منيش عارف أقولك إيه..ماهو إنتي حروف..ولا عارف ألوم علي مين.. عموماً ياللي كارهاني.. وفضحاني قصاد الناس..أنا لسه علي وضوئي...وبحلفلك بألف يَمين.. هاسيب إحساسي يندهلِك..وأخلي القلب يندهلِك..وحتي الروح هاتندهلِك..وراضي تجيبي لو حرفين..لكن لجل اللي كان بيننا.. عشان خاطري.. بلاش تقوليلهم إني حزين..ولما تكوني هتنامي علي الأوراق..قوليلي قبلها يمكن...أخبي الدمع جوه العين.. وأكَتِف فيا كام إحساس..عشان أكتب لكل الناس.. أنا عُمري ماكنت حزين.بقلم...محمد عسل
ليست هناك تعليقات:
إرسال تعليق