عاشق..ع الحدود / بقلم الشاعر/ فوزى السيد
عاشق..ع الحدود
====
عاشق وعشقك
ف الضلوع بركان
لا ف يوم هدي
ولا ناوي يهدي
من زمان
بركان جمال
بركان غضب
بركان حنان
وف قلبي اشواق للسما
متعلمه ومعلمه
علي خد كل صباح
لو اضحك لك تبان
يامصر يا ام النوح
وام العشق
مخزنه احزان
وان كان علي روحي
رميتها ف حجرك
بغير اتمان
روحي اطلبيها
مش كتير
انا الامير
اللي ف غرامي ولهفتي
عنتر زمان
طاير علي جناح الحنين
انا من سنين
راسم حروف اسمك
علي نور الجبين
بخيوط ستان
شابت كتير قبلي
ولاد متأ صله
راحت دماهم
تحت سن المقصله
وشهقت من روحي
عروقي موصله بيهم
ولا كنتش جبان
قايم علي حدودك
اصون عودك
وموعودك
اعيش العمر
واقف ديدبان
كما كل مصري اصيل
سقاه النيل
لا يشكي م الوجع
ولايطلب الاشياء
فقير
لكني ضمير
بيمشي بين خطوط المر
صابر ع الزمان
اعيش همي ..اصون امي
واخليها
واموت ليها
واحميها
واعديها
شطوط الذل
رافض للهوان
قالت لي ..يابني
داعيالك
يروق بالك
وربك للغريب عوان
وانا راضيه ومتراضيه
وعارفه ولادي
وقت الشده
احوالهم
واهوالهم
كما تطلق
طيور الجان
دراع واحد يصب الرهبه
ع الاعداء
بلا اسماء
ولا عنوان
انا حروفك
انا كفوفك
انا المصري
انا البركان
.............................تأملات الشاعر فوزي السيد
ليست هناك تعليقات:
إرسال تعليق