سياسة التطنيش / بقلم الشاعر/ الطيب عوض أحمد
قصيدة ( سياسة- التطنيش ) شعر العامية
بقلم / الطيب عوض احمد
طنش يله عدى وعيش
إياك تدخل وسط الدايره
أوعى تقول فيه ولا مفيش
اشتم واصرخ من جواك
بس ف سرك
ولما يكون في حد معاك
خبي ف صدرك
ارسم فوق وشك كرانيش
حتى حبايبك
حرس منهم أوعى وحاذر
خليك واعي فاهم قادر
وان سألوك راح تعمل أيه
قول ولا حاجه
خليني واحد من الطرابيش
أوعاك يوم تكون معروف
خليك عايش جوه الخوف
أنت وساكت بص وشوف
مهما هتعمل
مش هتغير يبنى الكون
ولا يوم تحلم تبقى هرقل
مش هيكون
خاف من الكل
خاف من نفسك
دى العصافير مستنيه همسك
أيه المعنى
لو عارف متعرفنيش
أصل أنا ساكت
وبحب سياسة التطنيش
احسب ألف حساب لخطاك
اعرف أن عدوك من جواك
أصل عدوك مش إنسان
يمكن يكون قلة فهمك
ولا استعباطك
أو حتى شيطان
أوعى تصدق انك فارس
أو على مالك عايش حارس
يبنى الفهم أصله رزينه
مكنوش قالوا العقل دى زينه
والضحكة
لو طالعه حزينه
سيبها تعيش
يمكن حلمك يبقى حقيقه
وأيه المعنى متسألنيش
بقلم / الطيب عوض احمد
8/11/2015
ليست هناك تعليقات:
إرسال تعليق