ربة جمال العاشقين / بقلم الشاعره / إيزيس غانم

من كام سنه وانا بلمحك..

من غير ما تلمحنى ...

وأنحت اللمحات صور..

على خدّ بلورة عينيا ..

وأركنها متجملة ....

على رف عقلى ..!

ما انت قبل ما تسكن

النبض ف عروقى ...

كات رعودك برق يضوى ..

كات رعودك سيف .

إحتل من مملكتى ضوئى..

غرقّ كيانى بالمطر...

وكأنك..إله رعد الخصوبه..

كأنك ..مسيحى المنتظر..

يااااااااااااااااااه...

من كام سنه وأنا بنتظر

لحظة شروقك..

لحظة ما تخطفنى..

على حصان التمنى ..

وترنم الألحان أغانى..

بين شفايفك...

وأنا اللى بين جناحين حصانك..

فينوس..ربة جمال العاشقين..

لكن قصادك حسيت مراية فتنتى

مفتونه من فتنة جمالك..!

هوّ إنت يوسف..وللا مين..؟

وكنت مستنينى فين....؟

ماأنا بلمحك من كام سنه ..

بس النهارده ..حساك عينيا ..

شمس طالعه من قلب ننى العين ..!!

هو انت مين...؟

حبيبى قول لى إنت مين..؟

ولو ما قولتش ..يكفينى إنك...

عطيتى ..وهديتى ..

من رب كل العالمين...!

ــــــــــــــــــــــــــــــــــــــــــــــــــــ

قصيدة \\ ربة جمال العاشقين ..

من ديوانى الثانى ..

‫#‏إيزيس‬ ‫#‏غانم‬